因為太過份，所以我第一次寫食評上openrice，將呢間野的劣行公諸與世！

歡迎轉貼！

地址 : 旺角太子道西193號新世紀廣場5樓美食天地543店
電話 : 2628 3428
菜式 : 京川滬 (外賣店, 中菜館, 小食, 海鮮)
消費 : 儉 (每人 $40 以下)

我同女朋友見呢間野係成個foodcourt最平，咁就幫襯佢地啦。

佢叫左$22的上海粗炒，有一杯豆漿，有個粉絲湯。個上海粗炒就又冇肉又冇菜，淨係得麵，仲有陣梘水味；杯豆漿就溝哂水；粉絲湯就不過不失啦。

我叫左$28的回鍋肉套餐，有個菜飯，有個酸辣湯，仲有杯柑桔蜜。我都係貪佢有酸辣湯飲，點知一飲落去，嘩！得個酸字，仲要係不尋常的酸，好似變壞左咁，飲左兩啖就頂唔順；個菜飯硬掘掘，又係有怪味，都唔知D飯熟未；回鍋肉還可以，但杯柑桔蜜應該又係溝左好多水。

o係我地講緊D野有幾難食o既時候，原來隔離兩位小姐都都中左招，又係買左返黎食左幾啖就頂唔順。隔離位小姐好似係食糖醋魚，話D野食”肅”左。佢仲話見到之前有人叫左個雲吞雞，食淨成三份二就走左……

我女朋友頂唔順，食左幾啖就食唔落，話要買其他野食。咁我條氣又唔順，就拎返我個餐同佢講話ｄ野有問題啦，佢地D態度又差，我話個酸辣湯有問題，有個阿姐仲話「酸辣湯梗係酸架啦！」唔好玩我啦，我又唔係未飲過酸辣湯，都未飲過咁難飲的酸辣湯。有個阿姐態度好差咁問我想點，另一個阿姐就話「佢都係想唔俾錢姐」，咁就退返錢俾我。

本來都算啦，退返一個餐錢，我同女朋友買碗雲吞麵share就算。我都唔好意思叫佢退埋另一個餐，當自己唔好彩就算。不過見佢頭先態度咁差，咪拎返盤上海粗炒俾佢，同佢講「D野咁難食，我還返俾你」。點知個阿姐仲聲大大咁我玩野搞搞陣，仲叫我報警！又話淨係得我一個覺得佢地D野有問題。我咪話唔係呀，係四個人都覺得你地D野食有問題呀！

跟住仲好笑，佢話我隔離個小姐都唔係幫襯佢。果兩位小姐都睇唔過眼，出黎幫我口，個阿姐仲係咁鬧鬧鬧，結果個小姐打埋去食環署……我本來都想投訴埋佢碗酸辣湯同菜飯，不過食環署個職員話佢退返錢俾你，就即係冇賣過俾你架喇！原來係咁，所以順便提一提大家，如果ｄ野食真係有問題要call食環署，千奇唔好俾人收返D野食。

總之呢間野就呢世人都唔會再去架喇！

P.S. 抵食係1分，因為佢雖然係平，但成盤都唔食得，即係白俾錢，我捐左ｄ錢好過。

http://www.openrice.com/restaurant/sr2.htm?shopid=13347